Макал лакаптар жыйнагы (П)

П тамгасына кыргызча макал лакаптар жыйнагы — бул жыйнакта билим, ден-соолук, адамдар, мекен, жамандык-жакшылык, кыз-жигит, эрди-катын, эл башчылары, жаныбарлар, эмгек, акылдуулук, пайда-пайдасыз, тил, эне-ата, акыйкаттык жана башка көптөгөн турмуш-тиричиликке байланышкан кыргыз эл макал лакаптарын жыйнадык.

Достор П тамгасына болгон макал лакаптар аз, ошондуктан бул бөлүмдү толуктоого силерди чакырабыз, пикир жазуу формасына П тамгасынан башталган макалдарды кошсоңуз болот. Заманбап, жаңы макалдар дагы жаза бергиле, макалар элдики.

П

• Паанасы жок сайдан кач, кайры жок байдан кач.
• Падыша тукумун жеке уул даңазалабайт.
• Пайгамбар баарына асыр.
• Пайгамбар барына назир (ыраазы).
• Пайгамбар да күйөө баласын сыйлаптыр.
• Пайгамбар кудаа эмес, кудаадан жудаа эмес.
• Пайгамбарга бар назир.
• Пайданы башыңа кыл, башыңдан артса досуңа кыл.
• Пайданы көрсө соодагердин шакыйы кармап, чыдай албай, буту менен эмес, төбөсү менен чуркайт эмеспи.
• Пайданы өз башыңа кыл, башыңдан артса башкага кыл.
• Пайдасыз тууган — чекеге чыккан чыйкан.
• Палан жерде алтын бар, өз жериңдей кайда бар.
• Паракорлор кызыгат бир токочтук тыйынга.
• Пейил күтсөң, битир бергенди унутпа.
• Пейли жакшы кем болбойт, пири болбой эл болбойт.
• Пейли жакшы кем болбойт.
• Пейли жакшыны кудай табат, пейли жаманды ит кабат.
• Пейли жаман кишиден күтөт, өз ашын жашырып ичет.
• Пейли кенен — калысчыл, пейли тар — арызчыл.
• Пейли кеткен пенденин казанынан аш кетет.
• Пейли тар адам кең идиштен аш иче албайт.
• Пенде болмок бир жылда, ажы болмок кырк жылда.
• Пенде пейлинен табат.
• Перзент белдин (жандын) кубаты, берен (болсо) элдин кубаты (Камкор малдын кубаты).
• Перилердин ойной турган жери бар, аюунун чээни бар.
• Пил көтөрбөгөндү тил көтөрөт.
• Пулсуз калаа — көрксүз, гүлсүз талаа — көрксүз.
• Пулу бардын — кеби он, пулу жоктун — кеби тоң.
• Пулу бардын оозу чайнайт, пулу жоктун көзү жайнайт.
• Пулун пулдай албаган, досун сыйлай албайт.
• Пулуң болсо, кулуңмун.